uto - 02.05.2006
jopet ja na radio, najlipše fala Radio Splitu
e...

jeste li poza podne slušali Radio Split, emisiju Marjane, naš Marjane, a? onu o Splitu nekad i sad ča je s onoliko jubavi i duše vodi šjor Ivica Ursić, a? oni ča su slušali znaju o čemu je bila rič, a onima ča nisu čuli ćemo sad reć, e...

najprvo mi je doša ovi mail:

Date: Mon, 5 Dec 2005 12:31:41 +0100 (Central European Standard Time)
From: "EMPORIUM" emporium@post.t-com.hr
To: xvii_st@yahoo.com
Subject: JOŠ JEDNO RADIJO

Zdravi i veseli bili!
Evo gre sveti Nikola i poza njin sveta Luce a ja bi tija
u moju emisiju meknit čagod životnega za ove dane.
Vidin Paola se sitila prva ma meni ni to problem.
Ja van radin na jedno drugo radijo, ako znate to van je radijo Split,
a bokun moje emisije se zove MARJANE, NAŠ MARJANE i gre suboton od 2 do 3 bota,
a gre nedijon na satelit (glas Rvatske) za cilu zemajsku balotu.
Ja bi citira koju vašu rigu sa bloga (joj koja rič, pari beštimja) ako nimate ništa protiv?
Stojte mi dobro i samo naprid.
Ivica Ursić
Hrvatski radio Radio postaja Split


ovo ča se spominje šjora Paola, to van je ona sa Radio Dalmacije, e... za one ča su malo zaboravili evo link na moj tekst o temu kako je i šta šjora Paola Kranjčević na Radio Dalmaciju govorila o ovemu blogu, e...

narafski da smo čoviku rekli da more, poza tega se čovik zafalija i posla mi je još mail da znan kad će to ić.

Date: Tue, 6 Dec 2005 20:26:51 +0100 (Central European Standard Time)
From: "EMPORIUM" ivica.ursic@st.htnet.hr
To: "XVII" xvii_st@yahoo.com
Subject: Re: JOŠ JEDNO RADIJO

Bog Nado!
Fala još jedan put.
Emisija (di se spominje blog i XVII) gre 17. XII.
Sritan Božić i sve najboje u Novon litu.
Ivica


e sad ćete reć a šta nan nije ovod bilo bokun obavisti da slušamo, a? a oli vi općenito ne slušate tu emisiju, a? spliske riči i užance, suboton u 2 ure, a? ajmo, to triba navit kad se god more, e...

a ča se danas pozapodne moglo čut, a? uajme, bija je pravi gušt slušat kako se u tu emisiju sa puno duše spominju sve moguće spize ča se činidu oko božića i za sam božić. šjor voditelj je čita iz raznih izvora o fritulama, kako su se činile, kako se mišalo/dizalo tisto za njih, kako su lipo vonjale, kako se svaka domaćica svojima falila i na pjatin nosila kušat u susidstvo, ali i kako su po nikin ricetama sutra bile žilave i tvrde da si s njima moga komodno ubit čovika ako bi ga kojon strefija u ćivericu, e...

poza tega je teplo čovičanstvu priporučija ricetu za fritule ča je na internet na blogu daje XVII. zaradi čega? zaradi tega ča su te fritule jednostavne za učinit, vonju ka mali bog, a dobre su i sutra, ma moredu čak i prikosutra, e... šjor voditelj je cilon svitu objasnija da na desnu bandu ovega bloga jema link na Ricete by XVII, a svoju gospoju je priko radija najlipje zamolija da mu učini fritule baš po toj riceti, e... čita se i tekst o' lani o smislu božića, morete doć priko šufita tot, a morete i priko ovega linka. riči sa moga bloga je spominja na početku, sredinon i na kraju emisije i moran priznat da mi je puno drago ča me tako nafalija. emisiju je počeja sa ovin mojin ričima, a ja ću š njima finit za danas, e...

digod
kad svi posli fine,
kad već dođe kasna ura,
kad čovik ostane sam sa sebon,
kad mu se oči već sklapaju od umora,
(e ka sad, e)
dođe mi da napišen samo dvi riči, e...


fala (šjor) Ivica!
notano o' xvii: 17.12.2005., 16:35
stivano ovod na dan i uru 2. svibanj 2006 10:18:00 o' XVII
0 komentara link na post
0 komentara
link na ovi post:
<$BlogBacklinkControl$> <$BlogBacklinkTitle$> <$BlogBacklinkDeleteIcon$>
<$BlogBacklinkSnippet$>
posted by <$BlogBacklinkAuthor$> @ <$BlogBacklinkDateTime$>
<$BlogItemBacklinkCreate$>
<< Home